ಸಂತಾನ ದೇಗುಲದಲ್ಲಿ …

ನಡು ಮಧ್ಯಾಹ್ನದ ಹೊತ್ತು ಯಾವುದೋ ಗುಟ್ಟನ್ನು ಅರಹುವಂತೆ ಕಾರನ್ನು ರಸ್ತೆ ಬದಿಗೆ ಸರಿಸಿ ದೂರದದೊಂದು ದೇವಾಲಯದ ಕುರಿತು ನಮ್ಮ ಗೈಡ್‌ ಹೆಳಬಾರದ್ದೇನೋ ಹೇಳುವಂತೆ ಮೆಲ್ಲಗೆ ಉಸುರಿದ. ಕೊಳಲ ಗಾನದಂತೆ ಬೀಸುತಲಿದ್ದ ಗಾಳಿಗೆ ಹಸಿರು, ಹಳದಿ , ಕೆಂಪು ಭಾವುಟಗಳು ಹಾರುತಲಿದ್ದವು. ದೂರದಿಂದ ನೋಡುವವವರಿಗೆ ಅತಿ ಸಾಮಾನ್ಯ ಒಂದು ಹಳ್ಳಿಯ ನಡುವಿನ ಸಾಮಾನ್ಯ ದೇಗುಲದಂತೆ ತೋರಿತು. ೩೦೦ ರೂಪಾಯಿ ಶುಲ್ಕ ತೆತ್ತು ಅಷ್ಟು ದೂರಕೇಕೆ ನಡೆದು ಹೋಗಬೇಕು? ಅದೂ ಈ ನಡು ಮಧ್ಯಾಹ್ನ! ಇಲ್ಲಿನ ಹೆಚ್ಚಿನ ದೇವಾಲಯಗಳಿಗೆ ೩೦೦-೫೦೦ ರೂ ಶುಲ್ಕ ತೆತ್ತು ಒಳಹೋಗಬೇಕು. ಗೈಡ್‌ ಪಿಸುಗುಟ್ಟಿದ್ದು ಅರ್ಥವಾಗದೇ ಸುದ್ದ ಇಂಗ್ಲೀಸಿನಲ್ಲಿ ಅರಹು ಎಂದೆ. ʼಫರ್ಟಿಲಿಟಿ ದೇವಾಲಯʼ ಎನ್ನಬೇಕೇ ಆತ. ಯಾರು ಯಾರನ್ನು ಹೇಗೆ ಫರ್ಟೈಲ್‌ ಮಾಡುವರೋ ಎಂಬ ಜಿಜ್ಞಾಸೆಗೆ ಬಿದ್ದೆ. ಮೆದುಳಿನ ನರ ನಾಡಿಗಳಲ್ಲಿ ಅಚ್ಚರಿಗಳ ಆಘಾತ! ಇಲ್ಲಿನ ದೇವಾಲಯ, ಹೋಟೆಲ್‌, ಮಳಿಗೆಗಳ ಗೋಡೆಗಳಲ್ಲಿ ಚಿತ್ತಾರಗೊಂಡ ನಸು ಗೆಂಪು, ಕಂದು, ನೀಲಿ ನಗ್ನ ಶಿಶ್ನ ಕುತೂಹಲದ ಕಣ್ಣೊಡೆಯಿಸಿತ್ತು! ಕಿಟಕಿ ಪರದೆಯಲ್ಲೂ ಹಣಕಿ ಹಾಕಿ ಕೆಣಕಿದ್ದವು. ಕೇಳುವುದಾದರೂ ಯಾರಲ್ಲಿ ಹೇಗೆ ಎಂಬ ಪ್ರಶ್ನೆ ಸೂಕ್ತ ಸಮಯಕ್ಕಾಗಿ ಕಾಯುತ್ತಿದ್ದವು. ಭಾಷಾ ಗೊಂದಲ ಎಲ್ಲವು ಸೇರಿತ್ತು. ಪುಳಕಗೊಳಿಸುವ ಪುನಾಕದಿಂದ ೪ ಮೈಲಿ ದೂರವಿರುವ ಸೋಪ್‌ಸೋಕಾ ಎಂಬ ಹಳ್ಳಿಯಲ್ಲಿ ಕುಚದಂತೆ ಎದ್ದ ಸಣ್ಣ ಗುಡ್ಡದ ಮೇಲಿದೆ ಈ ಫರ್ಟಿಲಿಟಿ ಮಂದಿರ! ಹೆಸರು ಚಿಮಿ ಲಾಕಾಂಗ್.‌ 

ಜೋಳಿಗೆಯಲಿ ಜೋತುಬಿದ್ದ ನಮ್ಮೂರ ನವಿಲುಗರಿ…….

ಭಾದ್ರಪದ ಮಾಸದ ಹೊಂಬಿಸಿಲು. ಪೈರುಗಳ ಹಾದು ಹೊಂಗಿರಣವ ಚೆಲ್ಲಿತ್ತು. ಇಕ್ಕಟ್ಟಿನ ರಸ್ತೆಯಲಿ ಗೂಡಂಗಡಿಗಳ ಸಾಲು. ಭೂತಾನಿನ ಕಲೆಯನ್ನೇ ಮಾರಾಟಕ್ಕಿಟ್ಟ ಗಾರುಡಿಗರು. ನೆಲ ಹಾಸು, ರತ್ನ ಗಂಬಳಿ, ಪೈಂಟಿಗ್ ನಗ್ನ ಶಿಶ್ನದ ಮರದ ಪ್ರತಿಮೆಗಳು! ಚಿನ್ನದ ಬಣ್ಣಕ್ಕೆ ತಿರುಗಿದ ಭತ್ತದ ಗದ್ದೆಗಳು. ಎಲ್ಲವೂ ನಮ್ಮಂತೇ ಇದ್ದರೆ ನೋಡುವ ಕಣ್ಣುಗಳ ಬೆರಗು ಅಳಿಯುತ್ತದೆ. ಗುರುತಿಸುವಿಕೆಯಲಿ ಕಣ್ಣು ಸೋಲುತ್ತದೆ. ಭಿನ್ನವಾಗಿದ್ದರಷ್ಟೇ ಮನಸ್ಸು ತೆರೆದು ನೋಡುತ್ತದೆ. ಮನಸ್ಸು ತೆರೆದರಷೇ ಅಚ್ಚರಿಗಳೂ ತೆರೆದುಕೊಳ್ಳುತ್ತದೆ! ಮನಸ್ಸಿಗೆ ನೋಡುವುದ ಕಲಿಸಬೇಕು.

ಇಕ್ಕಟ್ಟಿನ ದಾರಿಯಲಿ ಮನೆಗಳ ಸಂಗಡ ಇಪ್ಪತ್ತು ನಿಮಿಷ ನಡೆದು ಗುಡ್ಡದ ತುದಿ ತಲುಪಿದೆವು. ಶುಲ್ಕ ಕಟ್ಟಿ ದೊಡ್ಡ ಪ್ರಾರ್ಥನಾ ಚಕ್ರ ತಿರುಗಿಸಿ ಮುನ್ನೆಡೆದೆವು. ಈ ವಿಚಿತ್ರ ದೇಗುಲಕ್ಕೆ ಹಳದಿ ಹಸಿರು ಕೆಂಪು ಪತಾಕೆಗಳು ಸ್ವಾಗತ ಕೋರಿದವು.

ವೈನ್‌ ಹೀರುವ ವೈನಾತಿ ದೇವರುಗಳು-

ಬದುಕಿನ ಯಾವುದೋ ಒಂದು ಒತ್ತಡವೊಂದು ಕುಡಿಯೊಡೆದ ಸಂದರ್ಭದಲಿ ಇಂತಹ ಸಂಪ್ರದಾಯಗಳು ಚಿಗುರುವವು ಎಂಬುದು ನನ್ನ ನಂಬಿಕೆ. ಭೂಮ್‌ ತಾಂಗ್‌ ಮಾನೆಷ್ಟ್ರಿಗೆ ಹೋದಾಗ ನಮ್ಮ ಡ್ರೈವರ್‌ ಬಿಯರ್‌ಗಾಗಿ ಹುಡುಕುತ್ತಿದ್ದ. “ಅಯ್ಯೋ 

ಮರಾಯ ಸಂಜೆ ಹುಡುಕಿ ಕುಡಿದರಾಯಿತು.” ಎಂದೆ. “ಬಿಯರ್‌ ಕುಡಿಯಲು ಅಲ್ಲಾ.” “ಮತ್ತೆ ಸ್ನಾನ ಮಾಡ್ತೀಯಾ?” ಕೇಳಿದೆ. “ಅಯ್ಯೋ ಮರ್ರೆ ದೇವರಿಗೆ ಅರ್ಪಿಸಲು.” “ವೈನು ಹೀರುವ ವೈನಾತೀ ದೇವರಗಳು.” ತನಗೆ ಪ್ರಿಯವಾದುದನ್ನೆಲ್ಲಾ ದೇವರಿಗೆ ಅರ್ಪಿಸಿ ಮನುಷ್ಯ ಕೃತಾರ್ಥನಾಗುತ್ತಾನೆ. ಮನುಷ್ಯನ ನಡೆಯ ಹಿಂದಿನ ಸೈಕಾಲಜಿ ಇಷ್ಟೇ! ಇಷ್ಟರವರೆಗೆ ಎಣ್ಣೆ ಹೊಡೆವ ದೇವರ ನೋಡಿರಲಿಲ್ಲ. ಎಣ್ಣೆ ಅರ್ಪಣೆ ಇಲ್ಲಿ ಹರಕೆ! ನಂತರ ಈ ಎಣ್ಣೆ ಬಾಟಲಿಗಳನ್ನು ಏನು ಮಾಡ್ತಾರೆ? ದೇವರೇ ಕುಡಿತಾರ ಎಂದು ಚೇಡಿಸಿದೆ. ಅವನಿಗೆ ನನ್ನ ಚೆಡಕಾನಿ ಅರ್ಥವಾಗದೇ ನಕ್ಕು ಸುಮ್ಮನಾದ. ನಾನೂ ಸುಮ್ಮನಾದೆ. ಪಾಪ ಅವನು ಮತ್ತು ಮಧ್ಯ ಅರ್ಪಿಸಿಕೊಳ್ಳುವ ಅವನ ದೇವರುಗಳು. ಎಣ್ಣೆ ಪ್ರಿಯ ದೈವಗಳು! ಇನ್ನು ಈ ಮನುಷ್ಯರಾವ ಲೆಕ್ಕ ಅಲ್ಲವಾ?😂😂

ಕರಾವಳಿಯ ಒಂದು ದೈವವೂ ಲಿಕ್ಕರ್‌ ಅರ್ಪಣೆ ಬೇಡುತ್ತದೆ ಎಂದು ಕೇಳಿದ ಮೇಲೆ ಸ್ವಲ್ಪ ಸಮಾಧಾನವಾಯಿತು. ಅಲ್ಲು ಮತ್ತು ಇಲ್ಲಿನ ಈ ದೈವಕ್ಕೂ ಸಾಮ್ಯ ಹೇಗುಂಟಾಯಿತೋ ತಿಳಿಯದು.  ಮನುಜನ ಸಹಜ ಸೈಕಾಲಜಿ ಇಲ್ಲಿ ಕೆಲಸ ಮಾಡುತ್ತೆ ಅಂದುಕೊಳ್ಳುವೆ. 

ಚಿಮಿ ಲಾಕಾಂಗ್‌

ಎಲ್ಲೆಲ್ಲೋ ಹತ್ತಿಳಿದ ಮನಸ್ಸನ್ನು ಚಿಮಿ ಲಾಕಾಂಗ ಮಾನೆಸ್ಟ್ರೀಯೊಳಗೆ ತೆರೆದಿಟ್ಟರೆ ಒಂದು ಹೊಸ ಲೋಕ ತೆರೆದುಕೊಳ್ಳುತ್ತದೆ. ದೊಡ್ಡ ಪ್ರಾರ್ಥನಾ ಚಕ್ರವನ್ನು ತಿರುಗಿಸಿ ಮುಂದಡಿ ಇಟ್ಟರೆ ಹೊರ ಬಿತ್ತಿಯಲಿ ಕಲ್ಲಿನ ಸ್ತೂಪ ಮತ್ತು ಗೋಡೆಯ ಬಿತಿಯಲಿ ದೃಕ್‌ ಪಾ ಕುನ್ಲೆ ಲಾಮಾನ ವರ್ಣ ಚಿತ್ರಗಳು ಅನಾವರಣಗೊಂಡಿವೆ. ಭೂತಾನ್‌ ಜನರ ಕಲೆಯಲ್ಲಿನ ರುಚಿಯನ್ನು ತೋರಿಸುತ್ತದೆ. ದೇವಾಲಯದೊಳಗೂ ಒಂದು ಪ್ರಾರ್ಥನಾ ಚಕ್ರವಿದೆ. 

ಇತಿಹಾಸ

ಹುಚ್ಚು ಸಂತನಿಗಷ್ಟೇ ಸಾಧ್ಯವೇನೋ ಇಂತಹ ಹುಚ್ಚಾಟಗಳು! ನಾನು ಈತನನ್ನು ಹುಚ್ಚು ಸಂತನೆಂದು ಹೇಳಿದ್ದೆದ್ದು ತಪ್ಪು ತಿಳಿಯಬೇಡಿ. ನಾನಲ್ಲ ಭೂತಾನಿಗರೇ ಈತನನ್ನು ಹುಚ್ಚು ಸನ್ಯಾಸಿ ಎದ್ದಿದ್ದಾರೆ! ಹುಚ್ಚರಾಗದೇ ಏನನ್ನು ಸಾಧಿಸಲಾಗದು. ಬುದ್ದಿಸಂನ ತಾಂತ್ರಿಕ ಮಾರ್ಗವನ್ನು ತೊರೆದು ಹೊಸ ಹಾದಿ ಹಿಡಿದವ ದೃಕ್‌ ಪಾ ಕುನ್ಲೆ. ಹಾಡು, ಸಂಗೀತ ಮತ್ತು ಹಾಸ್ಯದ ಮೂಲಕ ಬುದ್ದಿಸಂ ಕಲಿಸತೊಡಗಿದವ! ಇತನನ್ನು ಜನ ಹುಚ್ಚು ಸಂತ ನೆನ್ನದೇ ಬಿಟ್ಟಾರೆಯೆ? ಈತನೇ ಶಿಶ್ನದ ಚಿಹ್ನೆಯನ್ನು ಟಿಬೆಟ್‌ ನಿಂದ ತಂದನೆಂದು ನಂಬಲಾಗುತ್ತದೆ.

ಟಿಬೆಟಿನ ಅತಿ ಎತ್ತರದ ಪಾಸ್‌ ದೋ ಚುಲಾ. ಇದನ್ನು ಈತ ದಾಟಿ ಬರುವಾಗ ರಕ್ಕಸನೊಬ್ಬನನ್ನು ಕಾಣುತ್ತಾನೆ. ಈತ ತನ್ನ ಕುಲಕ್ಕೆ ಮಾರಕನೆಂದು ತಿಳಿದು ಆತ ಅವನನ್ನು ಕಲ್ಲಿನಲ್ಲಿ ಬಂಧಿಸುತ್ತಾನೆ ಎನ್ನುತ್ತದೆ ಜನಪದ. ಇನ್ನೊಂದು ಜನಪದ ಕತೆಯು ದೋಚುಲಾ ಪಾಸ್‌ ದಾಟಿ ಬರುವಾಗ ನಾಯಿಯ ರೂಪ ತಾಳಿದ ರಕ್ಕಸನನ್ನು ತನ್ನ ಶಿಶ್ನದ ಮೂಲಕವೇ ಸಂಹರಿಸಿದ ಎನ್ನಲಾಗುತ್ತದೆ!! ಅದಕ್ಕಾಗಿಯೇ ಈ ದೇವಾಲಯಕ್ಕೆ ಚಿಮಿ ಲಾಕಾಂಗ್‌ ಅಂದರೆ ನಾಯಿಗಳಿಲ್ಲದ ಎಂದು. ಇಂತಹ ವಿಚಿತ್ರಗಳ ಸೃಷ್ಟಿ ಕಾರ್ಯದ ಸೃಜನಶೀಲತೆ ಮನುಜನಲ್ಲಿ ಎಲ್ಲಿ ಅಡಗಿರುತ್ತದೋ?! ಇಂತಹ ನೂರಾರು ಸೃಜನಶೀಲ ಸೃಷ್ಟಿ ಕಾರ್ಯದ ಸ್ಪೂರ್ತಿ ಅರಸುತ್ತಲೇ ಇದ್ದೇನೆ. ಬದುಕಿನ ಖಾಲಿತನವೇ ಇಂತಹ ಸೃಜನಶೀಲ ಸೃಷ್ಟಿಯ ಹಿಂದಿನ ಪ್ರೇರಣೆ ಎಂಬುದು ನನ್ನ ನಂಬಿಕೆ. ಅಂದಿನ ಬದುಕಿನ ಏಕತಾನತೆಯೂ ಇಂತಹ ಆಚರಣೆಗಳ ಹಿಂದಿನ ಕಾಣದ ಕೈಗಳು! ಸಂಶೋಧಕರಿಗೆ ಸುಗ್ರಾಸದ ವಿಷಯ. 

ಸೃಷ್ಟಿ ಸಾಕ್ಷಿಯ ದಸ್ತಾವೇಜು

ಇದೆಲ್ಲಾ ಕಟ್ಟು ಕತೆ ಎಂದು ನೀವು ವಿಚಾರವಾದಿಯ ಪೋಜು ಕೊಡ್ತೀರಿ ನಂಗೊತ್ತು. ಇಷ್ಟೆಲ್ಲಾ ಕತೆ ಕೇಳಿ ಇದು ಕಟ್ಟು ಕತೆಯಲ್ಲಾ ಎಂದು ಸಾಕ್ಷಿ ನುಡಿಯಲು ಇಲ್ಲೊಂದು ಚಂದದ ಆಲ್ಬಂ ಇದೆ. ಇಲ್ಲಿ ಬಂದು ಪ್ರಾರ್ಥಿಸಿ, ಶಿಶುವಾದ ಸಾಕ್ಷಿಯನ್ನು ಪೋಟೋ ಸಮೇತ ಕೊಟ್ಟು ಕಳುಹಿಸಿದ್ದಾರೆ. ಕೇವಲ ಭೂತಾನಿಗರು ಮಾತ್ರವಲ್ಲ ಜರ್ಮನಿ, ಪ್ರಾನ್ಸ್‌ ದೇಶದವರ ಚಿತ್ರಗಳೂ ಇದರಲ್ಲಿ ಸೇರಿದೆ! ಮೂಗಿನ ಮೇಲೆ ಬೆರಳಿಟ್ಟಿರಾ!? ಎಷ್ಟೇ ಹುಡುಕಿದರೂ ಮೊಸರಲ್ಲಿ ಕಲ್ಲು ಸಿಗಲ್ಲ. ಬಿಟ್‌ ಬಿಡಿ.

ಆಚರಣೆ ಎಂಬ ಕೌತುಕ

ಸಪಾಟು ಬದುಕಿನ ಸೇನ್ಸ್‌ಷನ್‌ನ ಆಚರಣೆಗಳು ಹೇಗಿರುತ್ತವೆ ಎನ್ನುವ ಕುತೂಹಲವೇ? ತಿಳಿಯೋಣ ಬನ್ನಿ.

ಸಂತಾನ ನಿರೀಕ್ಷೆಯಲ್ಲಿರುವ ದಂಪತಿ ಈ ದೇವಾಲಯಕ್ಕೆ ಬಂದು ಪ್ರಾರ್ಥಿಸಬೇಕು. ಮರದ ದೊಡ್ಡ ಶಿಶ್ನವೊಂದನ್ನು ಪತ್ನಿಯ ಕೈಗಿಟ್ಟು ದೇವಾಲಯಕ್ಕೆ ಬರಿಗಾಲಿನಲ್ಲಿ ಮೂರು ಸುತ್ತು ಬರಲು ಹೇಳುತ್ತಾರೆ. ಹೆಣ್ಣೀಗೆ ಏಕೆ ಎನ್ನುವ ಅಧಿಕ ಪ್ರಸಂಗದ ಪ್ರಶ್ನೆ ಮಾತ್ರ ಕೇಳದಿರಿ. ಮರದ ಶಿಶ್ನದಿಂದ ಆಶೀರ್ವಾದ ನೀಡಲಾಗುತ್ತದೆ. ಇದು ಮುಗಿದ ಮೇಲೆ ದಾಳವೊಂದನ್ನು ಉರುಳಿಸಲಾಗುತ್ತದೆ. ಅದು ಬಿದ್ದ ಸಂಖ್ಯೆಗನುಗುಣವಾಗಿ ಈ ಆಚರಣೆ ಫಲಪ್ರದವೋ ವಿಫಲವೋ ಎಂದು ತಿಳಿಸಲಾಗುತ್ತದೆ! ಬಿದರ ಚೀಟಿಯೊಂದನ್ನು ಹೆಕ್ಕಿ ಹುಟ್ಟಲಿರುವ ಮಗುವಿಗೆ ಹೆಸರೊಂದನ್ನು ಇರಿಸಲಾಗುತ್ತದೆ. ಕೂಸು ಹುಟ್ಟುವ ಮುನ್ನ ಕುಲಾವಿಯಾ ಎಂದು ಕೇಳಬೇಡಿ ಮತ್ತೆ. ಒಂದು ಅದಮ್ಯ ಆತ್ಮವಿಶ್ವಾಸವೊಂದನ್ನು ತುಂಬಿ ಕಳುಹಿಸುವ ಪ್ರಯತ್ನದಂತೆ ನನಗೆ ಗೋಚರಿಸುತ್ತದೆ. ಈ ಅಪೂರ್ವ ಆತ್ಮ ವಿಶ್ವಾಸವೇ ಅವರಲ್ಲಿ ಕೂಸು ಚಿಗುರೊಡೆಯಿಸುತ್ತದೆ ಎನ್ನುವುದು ಪಾಮರನಾದ ನನ್ನ ಅಭಿಮತ! 

 

ನಂಬಿ ಕೆಟ್ಟವರಿಲ್ಲವೋ ಎನ್ನುತ್ತಾ ಅಲ್ಲಿಂದ ʼಎಂಜಲ್‌ʼ ಖಾನಾವಳಿಗೆ ಲಗ್ಗೆ ಇಟ್ಟೆವು. ಭೂತಾನಿನ ಬೆರಳು ಚಪ್ಪರಿಸುವ ಅಧ್ಭುತ ಊಟವೊಂದು ನಮ್ಮ ನಮ್ಮ ಉದರದಲ್ಲಿ ಮೆದುಳಿನ ನರ ಕೋಶಗಳಲ್ಲಿ ದಾಖಲಾಯಿತು.

ಭೂತಾನಿಗೆ ಬಂದರೆ ನೀವು ಇದೆರಡು ಸ್ಥಳಗಳನ್ನು ಮಿಸ್‌ ಮಾಡಲ್ಲಾ ಎನ್ನುತ್ತಾ ಸಂತನ ಸಂತಾನ ದೇಗುಲ ಪುರಾಣಕ್ಕೆ ಇತಿ ಶ್ರೀ ಇಡುತ್ತಿದ್ದೇನೆ. 

ಗೋಡೆಯ ಮೇಲೆ ಚಿತ್ರಿಸಿದ ಚಿತ್ರ.....