ಎಲೆಲೆ ಕೀಟ!!

ಎಲೆಯಂತಿರುವ ಹೊಟ್ಟೆಯ ಭಾಗ.

ಹೊಸಬನಲ್ಲನಿವ ಹಳೆಯ ಗಿರಾಕಿ

ಹೊಡೆಯುತಿದ್ದ ಮನೆ ಸನಿಹವೇ ಗಿರಕಿ 

ನನ್ನ ಹಳೆಯ ಗೆಳೆಯ!

ಬಾಯದು ಬಾಯಲ್ಲ

ಕಣ್ಣದು ಕಣ್ಣಲ್ಲ

ಇರುವಲ್ಲ್ಯಾವುದೂ ಇಲ್ಲ

ನೋಟಕನ ನೋಟ 

ಎಲ್ಲವೂ ಚಿತ್ತ ಬ್ರಾಂತಿ!!!

ಮಳೆಗಾಲದ ಒಂದು ಮುಂಜಾನೆ ಸಣ್ಣಗೆ ಮೋಡ ಕವಿದಿತ್ತು. ತಣ್ಣನೆ ಗಾಳಿ ಹೊಯ್ಯುತ್ತಿತ್ತು. ಅಜ್ಜಿ ನರುಕಿದಂತೆ, ಹುಡುಗಿ ಮಿಡುಕಿದಂತೆ  ಸುರಿಯುತ್ತಿತ್ತು ಮಳೆ. ಕೊಡೆಯೊಂದನು ಕೊಂಡು ಸರ್ಕಸ್ ಮಾಡುತ್ತಾ ಮನೆಯ ಸನಿಹದ ಕಾಡು ತಲುಪಿ, ಕ್ಯಾಮರಕ್ಕೆ ಬೇಕಾದ ಸಲಕರಣೆಗಳನು ಜೋಡಿಸುವ ಹೊತ್ತಿಗೆ ಮಳೆ ನಿಂತಿತು. ಕಾಡು ಹಬ್ಬಿದ್ದ ಕಡೆ ಕಣ್ಣು ಹಾಯಿಸಿದರೆ ಯಾವ ಕೀಟವೂ ಕಣ್ಣಿಗೆ ಬೀಳಲೇ ಇಲ್ಲ. ಕೆಲವು ಹೂಗಳ ಚಿತ್ರ ತೆಗೆಯೋಣವೆಂದು ಪರಿಮಳ ರಹಿತ ಕಾಡು ಹೂಗಳ ಸಾಂಗತ್ಯಕ್ಕೆ ನಿಂತೆ. ಕೆಲವು ಬಿರಿದಿದ್ದವು ಕೆಲವು ಬಿರಿಯುವ ತಯಾರಿಯಲ್ಲಿದ್ದವು. ಆಗಲೇ ಕಾಂಗ್ರೆಸ್ ಗಿಡದ ಬುಡದಲ್ಲೇನೋ ಅಲ್ಲಾಡಿದ ಅನುಭವವಾಯಿತು. ಅದೊಂದು ಒಣಗಿದ ಎಲೆಯಂತಿದೆಯೆಲ್ಲಾ ಎಂದು ಸುಮ್ಮನಾದೆ. ಮತ್ತೆ ಒಣಗಿದೆಲೆಯಲಿ ಸಣ್ಣ ಅಲುಗಾಟ. ಇದೇನೆಂದು ನೋಡೋಣವೆಂದು ಸನಿಹಕೆ ಹೋದರೆ ಯಾವುದೋ ಹುಳುವೊಂದನು ಗುಳಕಾಯಿಸಿ ಗಮ್ಮತ್ತಿನಲಿ ಕುಂಡೆ ಅಲ್ಲಾಡಿಸುತ್ತಿತ್ತು ಈ ಕೀಟ. ಅರೆರೆ ಇದು ಎಲೆಯಂತಿದೆ. ಎಲೆಲೆ ಕೀಟ. ಸಾಮಾನ್ಯ ನೋಟಕೆ ಸುಲಭಕ್ಕೆ ಯಾಮಾರಿಸುವ ಕಲೆ ಕರಗತ ಮಾಡಿಕೊಂಡಿದೆ. ಇದ್ದರೂ ಇಲ್ಲದಂತಿರುತ್ತದೆ. ಅದರ ಕಣ್ಣಿನಂತಿರುವ ಭಾಗ ಕಣ್ಣಲ್ಲ. ಬಾಯಿಯಂತೆ ರಚಿತಗೊಂಡಿರುವ ಭಾಗ ಬಾಯಲ್ಲ. ಎಲ್ಲವೂ ಮಾಯೆ ಬ್ರಾಂತಿ. ಕೆಳಗೆ ಬಾಯಿಯಂತಿರುವ ಅಂಗ ನಿಜಕ್ಕೂ ಅದರ ಬಾಯಿಯಲ್ಲ! ಅದರ ಒಳ ಪದರ ಗುಲಾಬಿ ಬಣ್ಣದಿಂದ ಕೂಡಿದ್ದು ತುಂಬಾನೇ ಆಕರ್ಷಕವಾಗಿದೆ. ಈ ಒಂದು ಕೀಟದಲ್ಲೇ ಅನೇಕ ಪ್ರಭೇದಗಳಿದ್ದು ಪ್ರತಿಯೊಂದು ಒಂದರಿಂದ ಒಂದು ಭಿನ್ನವಾಗಿವೆ. ಡ್ರಾಗನ್ ಹಾತೆ, ಇರುವೆ ಮುಂತಾದವೆ ಇವುಗಳ ಆಹಾರ. ಒಟ್ಟಾರೆಯಾಗಿ ಆಹಾರ ಸೂಕ್ಷ್ಮ ಸರಪಳಿಯ ಭಾಗವಾಗಿರುವ ಇವು ಅನನ್ಯ ಜೀವಿಗಳು. ಸೂರ್ಯನ ಕುದುರೆಗಳೆಂದು ಕರೆಯಿಸಿಕೊಳ್ಳುವ ಇವು ಕೀಟ ಜಗತ್ತಿನ ವಿಶಿಷ್ಟ ಮುಕುಟ ಮಣಿಗಳು. 

ಶ್ರೀಧರ್ ಎಸ್. ಸಿದ್ದಾಪುರ.

 

 

ಕಾಣದ ಕೀಟ ಲೋಕ..

ಸೂಕ್ಷ್ಮ ಅವಲೋಕಿಸುವವರಿಗೆ ಮಾತ್ರ ಪ್ರಕೃತಿಯ ತನ್ನ ವಿಸ್ಮಯಗಳನ್ನು ಬಿಟ್ಟು ಕೊಡುತ್ತೆ. ಇಲ್ಲಿ ಎಲ್ಲವನ್ನೂ ನಮ್ಮ ಮೂಗಿನ ನೇರಕ್ಕೆ ವಿಶ್ಲೇಷಣೆ ಮಾಡುವಂತಿಲ್ಲ. ನೋಡುವುದರ ಹೊಸ ಅರ್ಥಕೊಡುವಂತೆ ನೋಡಬೇಕು. ಅತಿ ಸೂಕ್ಷ್ಮವಾಗಿ ಅವಲೋಕಿಸಿಬೇಕು. ಪುಸ್ತಕಗಳನ್ನು ಪುನರಾವಲೋಕನ ಮಾಡಬೇಕು, ಸಮಾನ ಮನಸ್ಕರೊಂದಿಗೆ ಚರ್ಚಿಸಬೇಕು ನಂತರವೇ ಒಂದು ನಿರ್ಧಾರಕ್ಕೆ ಬರಬೇಕು. ಹೀಗೆ ಮಾಡಿದಾಗಲೂ

 ಕೆಲವು ವಿಚಾರಗಳು ಗೊಂದಲ ಪೂರ್ಣವಾಗಿಯೇ ಉಳಿಯಬಹುದು.  

ಕಳೆದ ಮಳೆಗಾಲದಲ್ಲಿ ವಿಚಿತ್ರ ಜೀವಿಯೊಂದನ್ನು ಕಂಡೆ. ಬಸವನ ಹುಳುವೊಂದು ಸಣ್ಣ ಟೊಂಗೆಗೆ ತನ್ನಿಡೀ ದೇಹವನ್ನು ನೇತು ಹಾಕಿಕೊಂಡಿತ್ತು. ಆದರೆ ಅದರ ಮೇಲ್ಬಾಗವು ಬಸವನ ಹುಳದ ಮೇಲ್ಬಾಗಕ್ಕೆ ಒಂಚೂರು ಹೋಲಿಕೆಯಾಗುತ್ತಿರಲಿಲ್ಲ ಜೊತೆಗೆ ಅದಕ್ಕೆ ಕಣ್ಣುಗಳಿರಲಿಲ್ಲ!! ಜೀವಿಯ ಕೆಳಭಾಗ ಬಸವನ ಹುಳುವಿನಂತಿದ್ದು, ಮೇಲ್ಬಾಗ ಮಾತ್ರ ಯಾವುದೋ ಲಾರ್ವೆಯನ್ನು ಹೋಲುವಂತಿತ್ತು. ಏನಿದು ವಿಚಿತ್ರ

 ಜೀವಿ ಎಂದು ಚಕಿತನಾದೆ. ಮೇಲಿನ ಭಾಗವನ್ನು ಹೋಲುವ ಜೀವಿಯನ್ನು ಅನೇಕ ಬಾರಿ ನೋಡಿದ್ದೆ. ನಮ್ಮ ಕಡೆ ಜವಳೆ ಎಂದು ಕರೆಯುವ ಜೀವಿಯನ್ನು ಹಿಡಿದು ತಿನ್ನುತ್ತಿರುವ ದೃಶ್ಯವನ್ನು ಸೆರೆ ಹಿಡಿದಿದ್ದೆ. ಆದರೂ ಅನುಮಾನ ಬಂದು ಹುಡುಕಾಡಿದೆ. ಕೆಲವು ಪುಸ್ತಕ, ಗೂಗಲ್ನ ಸಹಾಯ ಯಾಚಿಸಿದೆ. ಅಚ್ಚರಿಯೊಂದು ಕಾದು ಕೂತಿತ್ತು. ಬಸವನ ಹುಳುವನ್ನು ತಿನ್ನುವ ಜೀವಿಗಳ ಪಟ್ಟಿ ತಯಾರಿಸಿದೆ. ಕಪ್ಪೆ

, ಪಕ್ಷಿಗಳು, ಸರಿಸೃಪಗಳು ಮೊದಲ ಪಟ್ಟಿಯಲ್ಲಿದ್ದವು. ಇವಲ್ಲದೇ ಮಿಂಚು ಹುಳುವಿನ ಲಾರ್ವಾ ಕೂಡ ಬಸವನ ಹುಳುವನ್ನು ಇಷ್ಟ ಪಟ್ಟು ತಿನ್ನುತ್ತೆ ಎಂದು ಗೊತ್ತಾಗುತ್ತಲ್ಲೇ ಸಣ್ಣ ಮಿಂಚೊಂದು ಮೆಡುಲಾ ಅಬ್ಲಾಂಗೇಟದಿಂದ ಹೊಡೆಯುತ್ತಲೇ ಈ ಚಿತ್ರದ ಹೊಸ ಅರ್ಥವೊಂದು ಬಿಚ್ಚಿಕೊಳ್ಳುತ್ತಾ ಸಾಗಿತು.

ಮಿಂಚು ಹುಳುವಿನ ಲಾರ್ವವೊಂದು ಬಸವನ ಹುಳುವೊಂದರ ಚಿಪ್ಪೊಳಗೆ ಸಾಗಿ ತಿಂದು ಮುಗಿಸುವ ಕಾಯಕದಲ್ಲಿ ತಲ್ಲೀನನಾಗಿತ್ತು. ಗಂಟೆಗಳವರೆಗೆ ಅದನ್ನೇ ಹಿಡಿದು ಕೊಂಡಿತ್ತು. ಎಂಥಾ ವಿಸ್ಮಯವಲ್ಲವೇ?

      ಶ್ರೀಧರ್. ಎಸ್. ಸಿದ್ದಾಪುರ.

ಭಿನ್ನೋಟ

ಒಂದು ಭಿನ್ನ ನೋಟದ ಚಿತ್ರ.- ಇದೊಂದು ಹೊಸ ಅಂಕಣ. ಇಷ್ಟವಾದ ಚಿತ್ರಗಳ ಷೋಕೇಸ್..

ಪೋಲ್ಟಿಸ್ ಪ್ರಭೇದದ ಈ ಜೇಡದ ಚಿತ್ರ ಯಾಕೋ ಬಹಳ ಇಷ್ಟವಾಯಿತು. ಎರಡು ಕೋಡುಗಳ ನಡುವೆ ಸುಮ್ಮನೆ ಕೂತು ಧ್ಯಾನಸ್ಥನಾಗಿದ್ದಾನೆ. ಎಲೆಗಳ ಎಡೆಯಲ್ಲಿ ನೋಡುತ್ತಿದ್ದರೆ ಯಾವುದೋ ಪರಕಾಯ ಕಾಳಿನಂತೆ ಗೋಚರಿಸುವ ಇದು ಹೇಗೋ ನನ್ನ ಕಣ್ಣಿಗೂ ಕಾಣಸಿಕ್ಕಿತು! ಸುತ್ತಲಿನ ಪರಿಸರದಲಿ ಒಂದಾಗಿ ಕಾಣದಂತೆ ಬದುಕುವುದು ಅವುಗಳ ಅನಿವಾರ್ಯತೆ . ನಮ್ಮದು ಆದಷ್ಟು ಎಲ್ಲರ ಕಣ್ಣಿಗೆ ಬೀಳುವ ಹಪಾಹಪಿ ಮನಸ್ಸು!  ಮತ್ತಷ್ಟು ಚಿತ್ರಗಳೊಂದಿಗೆ ಮತ್ತೆ ಬರುವೆ. ಅಲ್ಲಿಯವರೆಗೆ ನಮಸ್ಕಾರ.. 

Poltys Spider